Երեկ Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Գայանե Կարախանյանը ստիպված էր հետաձգել վանաձորցի Սամվել Հարությունյանի, փաստաբան Վահագն Հայրապետյանի հայցի քննությունն ընդդեմ հատուկ քննչական ծառայության:
Դատարան չէր ներկայացել ՀՔԾ ներկայացուցիչը, չնայած պատշաճ ծանուցվել էր: Հայցադիմումով վիճարկվում է ՀՔԾ քննիչի որոշումը՝ քրեական գործը մերժելու մասին: Այն կապված է Լոռու մարզի ընդհանուր իրավասության դատարանի դատավոր, ներկայումս վարչական դատարանի դատավոր Արման Թովմասյանի եւ դատական կարգադրիչների կողմից քաղաքացի Սամվել Հարությունյանին գիշերվա ժ. 12-ին դատարան «բերման ենթարկելու», ծեծի ենթարկելու պատմության հետ:
Փաստաբան Վահագն Հայրապետյանը քննիչի, իբրեւ պետական կառույցի ներկայացուցչի բացակայությունը դիտեց անհարգալից վերաբերմունք դատարանի նկատմամբ եւ ասաց, որ քննիչի բացակայությամբ անհնար է շարունակել դատական նիստը: Դատական հաջորդ նիստը նշանակվեց հուլիսին:
