![\"\"](\"https://www.aravot.am/2011/aravot_arm/June/22/p14.jpg\")
Մահմուդ Ջիբրիլը, որը փաստացի կատարում է Լիբիայի ընդդիմության կառավարության անդամի՝ արտգործնախարարի պարտականությունները, երկօրյա այցով ժամանել է Չինաստան՝ այդ երկրի իշխանությունների հետ բանակցություններ վարելու նպատակով:
BBC-ի մատուցմամբ, ակնկալվում է, որ կողմերի քննարկման առարկա է լինելու Լիբիայում ստեղծված քաղաքական ճգնաժամը հաղթահարելու հնարավոր ուղիների հարցը: Հիշեցնենք, որ Չինաստանը, որը Լիբիայում նավթային շահեր ունի, հռչակել է այդ երկրի ներքին քաղաքականությանը չմիջամտելու եւ չեզոքություն պահելու քաղաքականություն:
ՄԱԿ-ի Անվտանգության խորհրդում՝ Լիբիայում ռազմական միջամտության վերաբերյալ հարցի քննարկման ժամանակ եւս Չինաստանը ձեռնպահ էր քվեարկել: Դրանից հետո Պեկինը մի քանի անգամ քննադատել է Լիբիայի տարածքը ՆԱՏՕ-ի ուժերի կողմից ավիահարվածների ենթարկելու փաստը:
Չինաստանի իշխանությունները նախկինի նման չի շտապում միանալ նաեւ Մուամմար Քադդաֆիի հրաժարականը պահանջող արեւմտյան երկրների առաջնորդներին: Այդուհանդերձ, BBC-ի մատուցմամբ, Լիբիայի ընդդիմության ներկայացուցչի այցը Չինաստան՝ դիտարկվում է որպես միջազգային հանրության կողմից լիբիական ռեժիմին հասցված մի նոր հարված:
Վերջին շրջանում Չինաստանն ավելի ակտիվ է հանդես գալիս հակամարտող կողմերի միջեւ քաղաքական համաձայնության հասնելու օգտին: Չինական իշխանությունների ներկայացուցիչներն արդեն երկու հանդիպում են ունեցել լիբիական ընդդիմության կառավարող վարչակազմի՝ Ազգային անցումային խորհրդի առաջնորդ Մուստաֆա Աբդուլ-Ջալալիի (նկարում) հետ:
Հունիսին եռօրյա այցով Պեկինում էր նաեւ Քադդաֆիի կառավարության ներկայացուցիչ, ԱԳ նախարար Աբդելատի Օբեյդին: Ընդ որում, չինական կողմը նրա հետ հանդիպման ժամանակ պնդել է հրադադարի հաստատման անհրաժեշտությունը՝ դա համարելով հակամարտող կողմերի «առաջնային խնդիրը»:
Լիբիական ընդդիմության ներկայացուցիչը Պեկինում կարող է նաեւ ապստամբներին ֆինանսական օգնության խնդրանք ներկայացնել: Լիբիական ընդդիմությանն արդեն ֆինանսական օգնություն են խոստացել Իտալիան, Ֆրանսիան, Քուվեյթն ու Քաթարը:
