![\"\"](\"https://www.aravot.am/2011/aravot_arm/June/17/p25.jpg\")
ՀՖՖ մամուլի քարտուղարությունը տեղեկացնում է, որ Հայաստանի ֆուտբոլի ֆեդերացիայի երեք ներկայացուցիչներ՝ միջազգային եւ արտոնագրման բաժինների ղեկավարներ Սաթենիկ Ամիրանյանը եւ Առնո Սարգսյանը, ինչպես նաեւ ՀՖՖ նախկին աշխատակից, 2009 թվականից ՈՒԵՖԱ-ի աշխատակից հանդիսացող Մոնիկա Մխիթարյանը ՈՒԵՖԱ-ից արժանացել են IDHEAP ֆուտբոլային կառավարման հավաստագրի:
Եվրոպայի ֆուտբոլային ղեկավար գերատեսչությունը 2010 թվականին Լոզանի համալսարանին կից հանրային կառավարման շվեյցարական բարձրագույն դպրոցի հետ համատեղ հիմնել է տասն ամիս տեւողությամբ «Ֆուտբոլային կառավարման ՈՒԵՖԱ-ի հավաստագիր» ծրագիրը (UEFA CFM), որը հիմնարար է ՈՒԵՖԱ-ի հիմնած մասնագիտական զարգացման ծրագրերի համար: Այն ուղղված է՝ ամրապնդելու եւ կազմավորելու ֆուտբոլային ազգային ասոցիացիաների աշխատակազմերի միջին օղակների արդեն իսկ ձեռք բերված գործնական գիտելիքները:
Եվրոպական բոլոր 53 ասոցիացիաներից ստացված դիմումների (յուրաքանչյուր ասոցիացիա կարող էր ներկայացնել առավելագույնը երկու թեկնածու) քննության արդյունքում ՈՒԵՖԱ-ն եւ IDHEAP-ը ընտրել են 33 մասնակցի՝ նրանց մեջ նաեւ վերը նշված հայ մասնագետները, որոնք գերազանցությամբ հանձնելով քննությունները՝ արժանացել են համապատասխան հավաստագրերի: CFM ծրագրի հաջողակ շրջանավարտներին հնարավորություն է տրվել ուսումը շարունակելու ՈՒԵՖԱ-ի մեկ այլ՝ ԴՖՄ ծրագրով:
ՀՖՖ մամուլի քարտուղարության հավաստմամբ, այդ ծրագրում Հայաստանը կրկին կներկայացնեն Սաթենիկ Ամիրանյանն ու Առնո Սարգսյանը, որոնց ուսումը շարունակելու որոշումը ստացել է ՀՖՖ ղեկավարության աջակցությունը:
