![\"\"](\"https://www.aravot.am/2011/aravot_arm/June/17/p18.jpg\")
Հարավային Օսեթիայի պաշտպանության եւ պետական պահպանության մոտ 200 աշխատակիցներ ներխուժել են խորհրդարանի շենք եւ պահանջել փոփոխություններ կատարել սահմանադրության մեջ, որոնք թույլ կտան նախագահ Էդուարդ Կոկոյտիին առաջադրվել երրորդ ժամկետով: Զինված անձանց գործողությունները ղեկավարել են պաշտպանության փոխնախարար Իբրահիմ Գասսեւն ու պետական պահպանության ծառայության պետ Գենադի Կոկոեւը: News.am-ի մատուցմամբ, նախօրեին Գերագույն դատարանն արգելել էր հանրաքվեի դնել Կոկոյտիի՝ երրորդ անգամ առաջադրվելու հնարավորության հարցը: Նախագահը նախքան հարցի քննարկումը հայտարարել էր, թե մտադիր չէ առաջադրվել: «Մենք խնդրեցինք սպասել, նախքան կքննարկենք օրակարգի հարցերը»,- ասել է խորհրդարանի նախագահ Յուրի Ջիցցոյտին: Վերջին տվյալներով, զինված անձինք լքել են խորհրդարանի շենքն ու տեղակայվել շենքի մոտ: Էդուարդ Կոկոյտին հանձնարարել է գլխավոր դատախազ Թայմուրազ Խուգաեւին՝ պարզել միջադեպի հանգամանքները:
