40 տարեկանից բարձր անձանց ակնաբույժները խորհուրդ են տալիս անպայման անցնել ակնաբուժական հետազոտություն՝ աչքերի հետ կապված որոշ հիվանդություններ վաղ շրջանում կանխելու համար: Խոսքը, մասնավորապես, գլաուկոմա հիվանդության մասին է, որը մինչեւ նշյալ տարիք ընթանում է գրեթե առանց ախտանշանների: Գլաուկոմայի վաղաժամ հայտնաբերման ու կանխարգելման նպատակով Երեւանի քաղաքապետարանի նախաձեռնությամբ «Քանաքեռ-Զեյթուն» բժշկական կենտրոնի ակնաբուժական կլինիկան, արդեն 4 օր է, մայրաքաղաքի ամբուլատոր պոլիկլինիկաներում իրականացնում է անվճար սկրինինգ հետազոտություններ: Ակցիան կտեւի մինչեւ հուլիսի 15-ը: Հիվանդության ռիսկային խմբում ընդգրկված քաղաքացիները հավելյալ, առավել մանրազնին հետազոտություն կանցնեն «Քանաքեռ-Զեյթուն» բժշկական կենտրոնում:
