ՊԱԿԻՍՏԱՆԻ ԻՇԽԱՆՈՒԹՅՈՒՆԸ ԿՀՎ ԳՈՐԾԱԿԱԼՆԵՐԻ Է ԿԱԼԱՆԱՎՈՐԵԼ

Պակիստանում կալանավորվել է ԱՄՆ Կենտրոնական հետախուզության վարչության ենթադրյալ հինգ գործակալ, որոնք օգնել են ամերիկացիներին՝ սպանել «Ալ-Քաիդայի» առաջնորդ Ուսամա բեն Լադենին: BBC-ի մատուցմամբ, այդ մասին հաղորդում են ամերիկյան ԶԼՄ-ները:
Պակիստանի միջգերատեսչական հետախուզության (ISI) կողմից կալանավորվածների թվում է այն տան տերը, որը ԿՀՎ-ն վարձակալել էր երկրի հյուսիսում գտնվող Աբբոտտաբադ քաղաքում բեն Լադենի տան դիտարկման համար: New York Times-ի փոխանցմամբ, կալանավորվածներից մեկն էլ պակիստանյան բանակի մայոր է, որը, իբր, գրառել է այն մեքենաների համարանիշները, որոնք նրա սպանությանը նախորդող շաբաթվա ընթացքում մուտք են գործել բեն Լադենի թաքստոցի տարածք:
Պակիստանցիների այս գործողությունը լրջորեն բարդացրել է Վաշինգտոնի եւ Իսլամաբադի հարաբերությունները: ԱՄՆ նախագահ Բարաք Օբաման ասել է, թե Պակիստանում ինչ-որ մեկը ակնհայտորեն հովանավորել է «Ալ-Քաիդայի» առաջնորդին՝ այն դեպքում, երբ պակիստանյան իշխանությունները պնդում են, թե նրա գտնվելու վայրի մասին տեղյակ չեն: Պակիստանի միջգերատեսչական հետախուզությունն առայժմ որեւէ կերպ չի մեկնաբանել ԿՀՎ գործակալների կալանավորման փաստը: