![\"\"](\"https://www.aravot.am/2011/aravot_arm/June/15/p24.jpg\")
Հայտնի հեռուստահաղորդավար Անդրեյ Մալախովը ամուսնացել է: Իր հարսանյաց հանդեսը նա կազմակերպել է Ֆրանսիայի Վերսալյան ապարանքում: Հաղորդավարի ընտրյալը «HFS» հրատարակչական տան տնօրենի աղջիկն է՝ Նատալյա Շուկլեւան: Dni.ru-ի փոխանցմամբ, նախապես հարսանյաց հանդեսը պլանավորված էր հուլիս ամսին, բայց ԶԼՄ-ների հետաքրքրությունից հեռու մնալու համար՝ նորապսակները փոխել էին հանդեսի օրը: Ընդհանրապես, նրանց սիրո պատմության մանրամասները միշտ գաղտնի են պահվել: Միայն հայտնի էր, որ հարսանիքը լինելու է Ֆրանսիայում:
Այն կայացավ նեղ ընտանեկան շրջանակում, Վերսալի ապարանքում: Այդ ապարանքի սրահի վարձակալությունը միայն արժե 150 000 եվրո: Հարսանեկան զգեստի համար հարսնացուն ծախսել է 50 հազար եվրո: Այն կարել էր հարսանեկան շորերի հայտնի դիզայներ Վերա Վոնգը: Ամբողջ հարսանեկան արարողության համար ծախսվել է մոտավորապես կես միլիոն եվրո: Նորապսակներն իրենց առաջին ամուսնական գիշերն անցկացրել են աշխարհի ամենաթանկ հյուրանոցներից մեկում՝ փարիզյան «Le Meurice»-ում, որտեղ VIP սենյակի մեկ գիշերվա արժեքը 4 հազար եվրո է: Սիրո այդ արքայական գիշերը նորապսակներին նվիրել էին նրանց ընկերները:
Հարսանիքից առաջ Մալախովը սիրելիին նվիրել էր շքեղ մատանի՝ ադամանդե քարերով, որի արժեքը տատանվում է 100-ից 150 հազար եվրոյի սահմաններում:
Զույգը չի պատրաստվում Փարիզում երկար մնալ, քանզի Մալախովը չի կարող ընդհատել իր հեղինակային «Пусть говорят» հաղորդաշարի նկարահանումները:
