![\"\"](\"https://www.aravot.am/2011/aravot_arm/June/15/p10.jpg\")
Տավուշի մարզի Բերդ, Դիլիջան եւ Նոյեմբերյան քաղաքներում վերջին տարիներին դատարանների շքեղ շենքեր են կառուցվել: Մարզկենտրոն Իջեւանում սկսվել է դատարանի նոր շենքի շինարարությունը: Ամենից տպավորիչը սահմանամերձ Բերդ քաղաքում մի քանի տարի առաջ գործարկված դատարանի շենքն է: Այն հիրավի Բերդի տարածաշրջանի ամենագեղեցիկ կառույցն է:
Միջնադարում մեծ ու շքեղ եկեղեցիներն էին հասարակ մարդկանց ակնածանք եւ վախ ներշնչում: Սահմանամերձ գոտում, սեփական տանը կից անգամ հավանոց սարքելու համար միջոցներ չունեցող կարիքավոր բնակիչները վախով են նայում դատարանի շենքին: Մարդիկ օրհնելով՝ իրար մաղթում են. «Դատարանի հետ գործ չունենաս»: Բնակչությունը գրեթե ամբողջությամբ կորցրել է հավատը դատարանների հանդեպ ու չի հավատում, որ դատարանը «հենց այնպես» կարող է արդար վճիռ կայացնել:
