Տարածաշրջանային հետազոտությունների կենտրոնի տնօրեն Ռիչարդ Կիրակոսյանը երեկ ասել է, որ ԱՄՆ նախկին դեսպան Մարի Յովանովիչը դեր ունի Հայաստանի իշխանությունների եւ ընդդիմության միջեւ երկխոսության մեկնարկի գործում: Փորձագետը հիշեցրել է, որ Մարի Յովանովիչը, ով լքեց Հայաստանը նախորդ շաբաթ, կզբաղեցնի ԱՄՆ պետքարտուղարի փոխօգնականի պաշտոնը: Կիրակոսյանի կարծիքով, Յովանովիչի կարիերայի աճը պայմանավորված է հենց Հայաստանում իր արդյունավետ աշխատանքով: «Նա իր աշխատանքի մեծ մասը անցկացրել է կուլիսների հետեւում, սակայն, ընդհանուր առմամբ, ԱՄՆ-ի քաղաքականությունը ուղղված էր Հայաստանում կայունության պահպանմանը»,- ասել է փորձագետը: «Մեդիամաքսը» հիշեցնում է, որ մարտի 23-ին ելույթ ունենալով Հայաստանում ՆԱՏՕ-ի տեղեկատվական կենտրոնում՝ Մարի Յովանովիչը հերքել էր պնդումներն այն մասին, որ ԱՄՆ-ն մասնակցում է Հայաստանի քաղաքական ուժերի միջեւ երկխոսության հաստատմանը:
