Հայաստանի միակ երաժշտական գրադարանը երեկվանից լարված վիճակում է: Ըստ տեղեկությունների, գրադարանի տարածքը վաճառվել է, եւ մոտ ապագայում գրադարանի աշխատողները եւ հարուստ գրական ֆոնդը հայտնվելու են փողոցում: Երեկ մենք այցելեցինք գրադարան՝ տեղում ծանոթանալու իրավիճակին: Գրադարանի աշխատակիցները, ծնողներ, գրադարանից օգտվող աշակերտներ եւ երաժիշտներ անհանգիստ էին: Տեղեկությունները, թե մշակույթի նախարար Հասմիկ Պողոսյանը վաճառել է գրադարանի տարածքը, այստեղ արագ էին հասել, եւ մարդիկ անորոշության մեջ էին եւ խիստ վրդովված:
Այս ամենին գումարվել էր նաեւ այն, որ գրադարանի երկարամյա տնօրեն Գուլո Նահատակյանը հունիսի 7-ին (նամակը նախարարի կողմից ստորագրված էր հունիսի 3-ին) նամակ էր ստացել մշակույթի նախարարից այն մասին, որ ՀՀ Աշխատանքային օրենսգրքի 111 հոդվածի 2-րդ կետով հունիսի 15-ից այլեւս նոր պայմանագիր չի կնքվելու տնօրենի հետ:
Գրադարանի տարածքը վաճառելու մասին տեղեկությունները երեկ մեր աղբյուրները եւս հաստատեցին եւ պնդեցին, որ ոչ միայն այս, այլեւ մի քանի այլ մշակութային տարածքներ նախարարը մոտ ապագայում կվաճառի կամ արդեն վաճառել է: Թե ուր են «քշելու» միակ երաժշտական գրադարանին, դեռ ոչ ոք չգիտի: Գրադարանի տնօրենի փորձերը՝ կապվել նախարարի հետ եւ փորձել հասկանալ իրավիճակը, ապարդյուն են անցել:
Ի դեպ, մեր հեռախոսազանգերին եւս երեկ չէին պատասխանում ինչպես նախարարության աշխատանքային, այնպես էլ մամուլի խոսնակի բջջային հեռախոսները: Գրադարանի աշխատակազմը խիստ վրդովված էր կատարվածով եւ այն հանգամանքով, որ նախարարը կամ փոխնախարարը նախքան որոշում կայացնելը հարկ չեն համարել խոսել կոլեկտիվի եւ տնօրենի հետ, պարզաբանումներ տալ: Մարդիկ շեշտում էին, որ իր աշխատանքային գործունեության ամբողջ ընթացքում տիկին Նահատակյանն աշխատել եւ աշխատում է որպես նախաձեռնող, բարեխիղճ, նվիրված եւ գործիմաց մասնագետ: Նրա ղեկավարության տարիներին գրադարանի ֆոնդերը հարստացել են, եւ այսօր միակ երաժշտական գրադարանում պահվում է այնպիսի երաժշտագիտական հարստություն, որն անգամ օտարներին է զարմացնում եւ հիացնում:
Գրադարանի կոլեկտիվը պատրաստ է մինչեւ վերջ պայքարել իր եւ գրադարանի իրավունքների համար: Մարդիկ համոզված են, որ նախարարը ինքնագլուխ է նման անհիմն որոշում կայացրել:
Արդեն նամակներ են պատրաստվում, եւ եկող շաբաթ դրանք կուղարկվեն երկրի նախագահին, ՀՀ վարչապետին, Ազգային ժողովի նախագահին:
Հ. Գ. Ի դեպ, աշխատանքային պայմանագրի ժամկետները չերկարաձգելու մասին նամակ է ստացել նաեւ Ազգային գրադարանի տնօրեն Դավիթ Սարգսյանը:
