![\"\"](\"https://www.aravot.am/2011/aravot_arm/June/10/p16.jpg\")
Ճապոնիայի ֆինանսների գործող նախարար Յոսիխիկո Նոդան (նկարում) այդ երկրի վարչապետի պաշտոնի հիմնական թեկնածուներից մեկն է: Հիշեցնենք, որ նախկին վարչապետ Նաոտո Կանը, որը կորցրել էր իր վստահությունը խորհրդարանում, առայժմ կարողացել է խույս տալ իրեն անվստահություն հայտնելու սպառնալիքից՝ խոստանալով առաջիկայում հրաժարական տալ: Reuters-ի մատուցմամբ, եթե նույնիսկ 54-ամյա քաղաքական գործիչը՝ Նոդան, որն այսօր համարվում է իշխող Դեմոկրատական կուսակցության հարկաբյուջետային քաղաքականության գաղափարախոսը, գլխավորի երկրի կառավարությունը, նրա համար էլ դժվար կլինի պայմանավորվել ընդդիմության հետ եւ «ապաշրջափակել» օրինագծերի ընդունումը խորհրդարանում: Դեմոկրատներն ուզում են կուսակցական ընտրություններում Նաոտո Կանի փոխարեն իրենց առաջնորդ ընտրել հենց Նոդային, եւ դա կարող է տեղի ունենալ հունիսի ընթացքում:
Փորձագետների կարծիքով, քաղաքական ճգնաժամը հաղթահարելու եւ մարտին տեղի ունեցած հզոր երկրաշարժից ու ցունամիներից հետո երկիրը վերականգնելու համար Ճապոնիային անհրաժեշտ է ձեւավորել իշխանության եւ Լիբերալ-դեմոկրատական կուսակցության կոալիցիա: Բանն այն է, որ ընդդիմությունն այսօր վերահսկողություն ունի խորհրդարանի վերին պալատում եւ ցանկացած պահի կարող է արգելափակել դեմոկրատների օրենսդրական նախաձեռնությունները:
