Մայիսի 28-ից հունիսի 5-ը Թաիլանդում անցկացվեց վետերանների միջեւ ֆուտբոլի աշխարհի առաջնությունը, որին մասնակցում էր նաեւ Հայաստանի հավաքականը: Ըստ ռեգլամենտի՝ առաջնությանը կարող են մասնակցել 38 տարեկանից բարձր ֆուտբոլիստները: Մեր թիմը մարզում էր խաղացող մարզիչ Արմեն Սանամյանը, նրանից բացի՝ Հայաստանի հավաքականի կազմում հանդես եկան Սամվել Պողոսյանը, Բաբկեն Մելիքյանը, Տիգրան Եսայանը, Լեւոն Ստեփանյանը, Արտակ Կարապետյանը, Գուրգեն Ենգիբարյանը, Աշոտ Ավետիսյանը, Վաղարշակ Շահնազարյանը, Գեւորգ Քամալյանը, Տիգրան Գսպեյանը, Ստեփան Բաղդասարյանը, Գագիկ Սիմոնյանը, Հովհաննես Պողոսյանն ու Արմեն Սահակյանը: Հուրախություն բոլորիս՝ մեր ընտրանին հիանալի խաղ ու արդյունք ցուցադրեց այս մրցաշարում՝ առաջին հորիզոնականը զբաղեցնելով «Ա» խմբում ու եզրափակչում ուժերը չափեց Իրանի հավաքականի հետ, որին, սակայն, զիջեց 3:0 հաշվով: Նկատենք, որ նախորդ առաջնությունում Հայաստանի հավաքականը զբաղեցրել էր նախավերջին՝ 7-րդ հորիզոնականը:
