Հունիսի 10-ին Ն.Ս.Օ.Տ.Տ. Գարեգին Բ Ամենայն հայոց կաթողիկոսը միջեկեղեցական եւ հովվապետական վեցօրյա այցով կմեկնի Վրաստան:
Ինչպես երեկ «Մեդիամաքսին» հայտնեցին Մայթ աթոռի տեղեկատվական համակարգում, այցը կկայանա Վրաց ուղղափառ եկեղեցու Իլիա Բ կաթողիկոս-պատրիարքի եւ Վիրահայոց թեմի թեմական խորհրդի հրավերով: Այցի շրջանակներում Ամենայն հայոց հայրապետը հանդիպումներ կունենա Վրաց ուղղափառ եկեղեցու Իլիա Բ կաթողիկոս-պատրիարքի, Վրաստանի Հանրապետության նախագահ Միխայիլ Սահակաշվիլիի, ինչպես նաեւ Վրաստանում հավատարմագրված դիվանագետների, կրոնական համայնքների առաջնորդների, վրաց եւ հայ մտավորականության հետ:
Հունիսի 12-ին նորին սրբության ձեռամբ կվերաօծվի Հավլաբարի Ս. Էջմիածին եկեղեցին: Հունիսի 13-15-ը Վեհափառ հայրապետը, ուղեկցությամբ վրաց պատրիարքի, Թբիլիսիից կմեկնի Ջավախք, ուր կայցելի Ախալցիխե, Ախալքալաք, Գանձա, Ասպինձայի, Նինոծմինդայի եւ Ծալկայի շրջկենտրոններ:
