Երեկ Բրյուսովի անվան լեզվաբանական համալսարանում կայացավ ուսանողական գիտաժողով` նվիրված ՀՀ անկախության 20 եւ համալսարանի հիմնադրման 75-ամյակին: Մասնակցեցին ինչպես ԵՊԼՀ-ի, այնպես էլ ԵՊՀ-ի, Հայ-ռուսական (սլավոնական) համալսարանի, Երեւանի պետական ագրարային համալսարանի եւ Դիվանագիտական ակադեմիայի ուսանողները: Զեկուցումների թեմաները ընտրվել էին առաջադրված մի շարք ոլորտներից` քաղաքագիտություն, քաղաքականություն, երկրագիտություն, եվրոպագիտություն, արտաքին (միջազգային) հարաբերություններ, եւ առնչվում էին նաեւ ՀՀ հիմնախնդիրներին: Գիտաժողովի ամփոփումն ու մրցանակների հանձնումը տեղի է ունենալու հունիսի 14-ին: ԵՊԼՀ-ի դասախոս Լուսինե Պողոսյանի խոսքով` նման գիտաժողովներն ավելի մեծ գիտական կոնֆերանսների մասնակցելու փորձ ձեռք բերելուն, մասնագիտական ու ակադեմիական հետաքրքրությունները համատեղելուն, մտքերի փոխանակություն ու բանավեճեր ծավալելուն զուգահեռ՝ հնարավորություն են տալիս այնպիսի գիտական աշխատանքներ կատարել, որոնք հետաքրքիր են անձամբ ուսանողների համար եւ նպաստում են նրանց գիտական աճին:
