Վարդենիսում անասունների նոր հիվանդություն է թափ առնում: Ագրարագյուղացիական միավորման նախագահ Հրաչ Բերբերյանի տվյալներով, «դաբաղի» ու «խշխշան պալարի» արդեն 40 դեպք է գրանցվել: «Մոտ 180 հազար դոզա պատվաստանյութ է հանրապետության պահեստներում պահված, որն այդպես էլ չի կիրառվում: Ինչո՞ւ են ներկրել ու պահեստներում փտեցնում: Ասել եմ ու կասեմ՝ տգետներն են էս երկիրը քանդում»,- երեկվա ասուլիսում ասում էր պարոն Բերբերյանը: Նրա համոզմամբ, գյուղատնտեսության ոլորտում իրականացվող բարեփոխումները դոփում են տեղում ու անարդյունավետ են: Հաշվի առնելով, թե այս տարի ինչքան է կարկուտից վնասվել բերքը, պարոն Բերբերյանը վերջնականապես համոզվել է, որ հակակարկտային կայանները անարդյունավետ են. «Ծիրանի 25-30% , խնձորի 50% բերք է սպասվում, լավ վիճակում է միայն դեղձենին՝ 70%»: Բերքի կորուստները պարոն Բերբերյանը պայմանավորում է ոչ միայն անբարենպաստ կլիմայական պայմաններով, այլեւ ագրոտեխնիկական կանոնների խախտումներով. «Բուժանյութերը սխալ կամ ընդհանրապես չեն կիրառել: Հայաստանի նախագահի բոլոր հանձնարարականները ձախողել են»:
Նախորդ տարվա համեմատ՝ պակասել են կարտոֆիլի ցանքերը, չնայած սրան, Հ. Բերբերյանը վստահեցնում է՝ բարձր բերքատվություն է սպասվում, շուկայում էլ՝ գների նվազում: Ըստ նրա, շուկայում այս տարի նաեւ վարունգի ու լոլիկի առատություն է սպասվում: Բանախոսը ոլորտի զարգացման համար կառավարությանը խորհուրդ տվեց խթանել ցորենի արտադրությունը. «Կունենանք ցանքաշրջանառություն ու լուրջ բարեփոխումներ: Թե չէ՝ անհասկանալի է, ինչու ներկրեցին գարի, որը գյուղացու համար ոչ մի շահույթ չի ապահովում»: Նրա խոսքով, լուրջ բարեփոխումներ են անհրաժեշտ նաեւ ոռոգման համակարգում. «Պետք է վերացնել էդ ջեկերն ու ջոկերը: Այդ կազմակերպությունները փող են աշխատում գյուղացու հաշվին, ու երբ ուզում՝ անջատում են, երբ ուզում՝ միացնում են ջուրը»: Ագրարագյուղացիական միավորման նախագահը դրական է գնահատում ոլորտում կադրային փոփոխությունները, բայց գյուղատնտեսության նոր փոխնախարարի հետ հույսեր չի կապում. «Կադրային փոփոխությունները պետք են, բայց այն դեպքում, երբ դրանք առաջընթաց կապահովեն, այլ ոչ թե հետընթաց: Իսկ փորձառու փոխնախարարին անփորձի հետ փոխարինելը տրամաբանական չէ»:
