«Ջավախքում իմ հայրական տունն է, ես այնտեղ եմ ծնվել եւ ես չեմ կարող այնտեղ հյուր լինել»,- tert.am-ին ասել է ԱԺ պատգամավոր, ծնունդով ջավախքցի Շիրակ Թորոսյանը՝ մեկնաբանելով Հայաստանում Վրաստանի դեսպան Թենգիզ Շարմանաշվիլիի նախորդ օրն արած հայտարարությունը, թե՝ Թորոսյանը սրում է երկու ժողովուրդների հարաբերությունները եւ սպառնում Վրաստանի անվտանգությանը: «Թորոսյանի երբեմն անհավասարակշիռ հայտարարությունների գերազգայնականությունը թույլ չի տալիս նրան Վրաստանում ցանկալի հյուր համարել»,- հայտարարել էր Թենգիզ Շարմանաշվիլին: Շիրակ Թորոսյանի խոսքով՝ վրացական իշխանությունների խնդիրն է իր մուտքը Վրաստան արգելելը. «Նրանք կարող են դա անելու համար անգամ բացատրություններ չտալ, բայց եթե մեկնաբանություններ են անում, ապա պետք է դրանք հիմնավորված լինեն։ Դեսպանի այն խոսքերը, թե ես անհավասարակշիռ հայտարարություններ եմ անում, անհիմն են, եւ նրանք չեն կարող նման որեւէ օրինակ բերել»։
