![\"\"](\"https://www.aravot.am/2011/aravot_arm/June/1/p19.jpg\")
Լիբիայի առաջնորդ Մուամմար Քադդաֆիի բանակի ութ բարձրաստիճան սպաներ, այդ թվում՝ հինգ գեներալներ, փախել են Իտալիա: Այդ մասին, BBC-ի փոխանցմամբ, Հռոմում տեղի ունեցած մամուլի ասուլիսում հայտարարել էր Ուն ալի-Ուն անունով ներկայացած մի զինվորական, որը նաեւ կոչ է արել լիբիական բանակի զինվորականներին՝ «հանուն ազատության համար զոհվածների» դադարել Քադդաֆիի ռեժիմին աջակցել: Նա նաեւ ասել է, թե Լիբիայում «ցեղասպանություն» է տեղի ունենում, եւ դատապարտել է բռնությունները, որոնք կիրառվում են կանանց նկատմամբ երկրի շատ քաղաքներում:
Լիբիական բանակի մեկ այլ գեներալ՝ Մելուդ Մասուդ Խալասան հայտարարել է, թե Քադդաֆիի ուժերի արդյունավետությունը 20 տոկոսը չի գերազանցում, եւ որ նրան պաշտպանում է ոչ ավել, քան գեներալների 10 տոկոսը:
Լիբիայի ԱԳ նախկին նախարար Աբդել Ռահիման Շելգամը (նկարում), որն անցել է ապստամբների կողմը, եւս մասնակցել է Հռոմում կայացած ասուլիսին: Նրա ասելով, ընդդիմության կողմն են անցել 120 լիբիացի բարձրաստիճան զինվորական եւ պաշտոնատար այլ անձինք:
Հիշեցնենք, որ Լիբիայում փետրվարի սկզբին բարձրացված ապստամբությունից ի վեր տասնյակ սպաներ, նախարարներ ու դիվանագետներ են փախել Արեւմուտք:
