![\"\"](\"https://www.aravot.am/2011/aravot_arm/June/1/p17.jpg\")
Ռազմական հանցագործությունների մեջ մեղադրվող բոսնիացի սերբերի գեներալ Ռատկո Մլադիչը (նկարում) կարող է հանձնվել Հաագայի միջազգային քրեական դատարանին, որտեղ կկանգնի նախկին Հարավսլավիայի գործով դատարանի առաջ: Սպասվում էր, որ Մլադիչի հանձնումը Հաագային՝ տեղի կունենա երեքշաբթի օրը: Reuters-ի փոխանցմամբ, Սերբիայի իշխանությունները երեքշաբթի օրը Մլադիչին թույլ են տվել վաղ առավոտյան այցելել դստեր՝ Աննայի գերեզմանին, որը ինքնասպանություն էր գործել դեռեւս 1994թ.-ին: Իշխանություններն ասել են, թե այդ օրը կարող է նախկին գեներալի համար դառնալ Սերբիայում գտնվելու վերջին օրը:
Մլադիչը մեղադրվում է Սարաեւոյի պաշարման 43 ամիսների ընթացքում ցեղասպանություն իրականացնելու եւ Սերեբրենիցայում 1992-95թթ. 8 հազար մահմեդականների սպանության մեջ: Մլադիչը կալանավորվել էր անցած հինգշաբթի օրը, Բելգրադից 100 կմ հյուսիս-արեւելք գտնվող գյուղում: Նա արդարադատությունից թաքնվել է 16 տարի շարունակ:
Երեքշաբթի օրը Մլադիչի փաստաբանը բողոքարկել էր նախկին գեներալի հանձնման որոշումը՝ հայտարարելով, թե իր վստահորդի առողջական վիճակը թույլ չի տալիս նրան Հաագա տեղափոխել, ավելին, նա ասել է, թե Մլադիչի օրերը հաշված են: Նա հայտարարել է, թե մտադիր է բժշկական նոր տեղեկանք ներկայացնել դատարանին: Սակայն դատարանի՝ երեք դատավորից կազմված կոլեգիան մերժել է փաստաբանի բողոքը:
