2030թ. սննդամթերքի գները կարող են կրկնակի աճել, զգուշացնում է Oxfam միջազգային բարեգործական կազմակերպությունը։ Ինչպես հաղորդում է BBC-ն, որին մեջբերել է tert.am-ը՝ եթե պետությունների ղեկավարներն անհրաժեշտ քայլեր չձեռնարկեն, առաջիկա 20 տարվա ընթացքում հացահատիկային մշակաբույսերի գինը կբարձրանա 120-180%-ով։ Իր զեկույցում Oxfam-ը զգուշացնում է, որ սննդամթերքի գների այդքան կտրուկ բարձրացման հիմնական պատճառը կլիմայի գլոբալ փոփոխությունն է։ Ընդ որում, զեկույցում առանձնացվում են 4 «թեժ կետեր», որոնց բնակիչները սննդամթերքի սուր պակաս կզգան։ Այդ երկրներն են Գվատեմալան, Հնդկաստանը, Ադրբեջանը եւ Արեւելյան Աֆրիկայի երկրները։ Կազմակերպությունը կոչ է անում համաշխարհային առաջնորդներին քայլեր ձեռնարկել սննդամթերքի շուկան կարգավորելու ուղղությամբ, ինչպես նաեւ ստեղծել համաշխարհային ֆոնդ՝ կլիմայի փոփոխության դեմ պայքարելու համար։ Oxfam-ը նաեւ առաջարկում է պարենամթերքի շուկան կառավարելու համար մեծացնել պարենամթերքի ռազմավարական պաշարները, ներդրումներ կատարել ոչ մեծ ֆերմերական տնտեսություններում, դադարեցնել բիովառելիքի համար մթերք աճեցնելու փորձը եւ մեծացնել թափանցիկությունը հումքի շուկայում։
