«Երբ թատերական փառատոներում թատերագետ Նվարդ Ասատրյանը չի ընդգրկվում հանձնաժողովում, ուրեմն այն քըխ է, իսկ երբ հանձնաժողովում է, լավն է»,- երեկ Նվարդ Ասատրյանի ներկայությամբ նրա մասին այսպես արտահայտվեց Հայաստանի թատերական գործիչների միության վարչության թատերագիտության հարցերով քարտուղար Լեւոն Մութաֆյանը:
Ըստ բանախոսների, ամիսը մի քանի անգամ մշակույթի նախարարությունը հայտարարում է նոր թատերական փառատոնի մեկնարկի մասին: Այդպես՝ վերջին մի քանի ամիսների ընթացքում իրար ետեւից կայացան «Լոռի», «Արտավազդ», «Արմմոնո», «Թատրոն X» եւ այլ թատերական փառատոներ: Ն. Ասատրյանը հաստատեց՝ վերջին երկու ամսում Հայաստանում 10 թատերական փառատոն է տեղի ունեցել:
Լ. Մութաֆյանը զարմացավ, որ չի կարող փառատոների թիվը երկու ամսում 10-ի հասնել, նաեւ նշեց, որ փառատոն բառի շահարկմանը դեմ է. «Մեզ մոտ սխալն այն է, որ ամեն մի թատերական ստուգատես կոչում ենք փառատոն: Դեռ չենք ճշգրտել այդ սահմանը: Փառատոնն ամեն դեպքում հանդիսանք է, տոն, իսկ ստուգատեսը՝ հաշվետվություն»: Այն մտքին, որ փառատոներից առաջ թատրոնները սկսում են «գրդոնների» տեսքով ներկայացումներ բեմադրել, միայն թե մասնակցեն փառատոնին, Լ. Մութաֆյանը պատասխանեց. «Ճիշտ է, փառատոներն առաջացնում են որոշակի իրարանցում, կան բեմադրիչներ, որ վազում են մասնակցելու փառատոնի եւ կտրուկ անում բեմադրություններ: Բայց վերջին մի քանի փառատոներից ելնելով, դրանք ավելի շատ ներկայացնում են իրենց խաղացանկային բեմադրությունները, քան հանդես գալիս նորերով: Շտապողականությունն ու ամեն փառատոնին մասնակցելու միտումը առկա է երիտասարդ թատերական գործիչների մեջ, ինչին ես վատ աչքով չեմ նայում»:
Ն. Ասատրյանը, նկարագրելով փառատոնային ամիսները, ասաց. «Փառատոները այնքան շատ են, որ չես հասցնում հետեւել դրանց»:
