ՀՀԿ խմբակցության քարտուղար Էդուարդ Շարմազանովը երեկ հրավիրել էր մամուլի ասուլիս, որի ընթացքում բացատրեց, թե որն է իշխանություն-ընդդիմություն երկխոսության իմաստը. «Երկրում քաղաքական օրակարգը ձեւավորում է քաղաքական իշխանությունը, որովհետեւ քաղաքական իշխանությունը երկրում բոլոր գործընթացների պատասխանատուն է, եւ գաղտնիք չէ, որ իշխանությունների քաղաքական օրակարգը դեռեւս ապրիլին էր հայտարարվել նախագահ Սարգսյանի կողմից»: Ըստ Ազգային ժողովի պատգամավորի՝ քաղաքական իշխանությունները հաստատակամ են իրենց դիրքորոշման մեջ, այն է՝ Հայաստանում չպետք է լինեն քաղաքական ուժեր, որոնք կգնան ծայրահեղության եւ հասարակության մեջ ատելություն սերմանելու ճանապարհով: Էդուարդ Շարմազանովը կարծիք հայտնեց, որ երկխոսությունն այն է, երբ դու պատրաստ ես քո քաղաքական ընդդիմախոսների հետ նստել եւ զրուցել. «Ես հեռու եմ մտքից, որ եթե երկխոսություն է, նշանակում է՝ իշխանությունը կծափահարի ընդդիմությանը, իսկ ընդդիմությունն էլ՝ իշխանությանը: Ոչ, դա երկխոսություն չէ: Երկխոսությունն այն է, երբ դու պատրաստ ես քո քաղաքական ընդդիմախոսների հետ նստել եւ քննարկել Հայաստանի համար կարեւորագույն խնդիրները»: ՀՀԿ մամուլի խոսնակը կրկնեց միտքը, որ արտահերթ ընտրությունների առիթ չկա. «Մենք մեր կարծիքն ասել ենք, մեր երկրում իրավական, քաղաքական հիմք չկա արտահերթ ընտրություններ անցկացնելու համար, դրա համար պետք է ընդամենը Սահմանադրություն կարդալ»:
