Թուրքիայի խոշորագույն Ստամբուլ քաղաքի Բեշիքթաշ շրջանի առեւտրի կենտրոն հանդիսացող Էթիլեր թաղամասում, մարդաշատ վայրում պայթյուն է տեղի ունեցել, որի արդյունքում յոթ մարդ է տուժել: BBC-ի փոխանցմամբ, ականատեսներն ասել են, թե պայթյունը որոտացել է թաղամասի ավտոբուսի կանգառներից մեկում: Իշխանությունների հայտարարության համաձայն՝ տուժածներից մեկը ոստիկան է, եւ որ վիրավորների ստացած վնասվածքները կյանքի համար վտանգավոր չեն:
Տեղի ունեցած պայթյունի որեւէ վարկածի մասին չի հաղորդվում, եւ ոչ ոք առայժմ դրա պատասխանատվությունը չի ստանձնել:
Աղբյուրի մատուցմամբ, վերջին շրջանում Թուրքիայի անվտանգության ուժերը բերվել էին բարձր պատրաստության աստիճանի, ինչը պայմանավորված էր քուրդ անջատողականների կողմից հնչող սպառնալիքներով: Միաժամանակ, վերջին տարիներին երկրում ակտիվացել են նաեւ իսլամիստներն ու ձախակողմյան խմբավորումները:
Հիշեցնենք, որ հունիսի 12-ին Թուրքիայում տեղի են ունենալու խորհրդարանական ընտրություններ:
