![\"\"](\"https://www.aravot.am/2011/aravot_arm/May/27/p24.jpg\")
«Մեծ ութնյակի» (ԱՄՆ, Կանադա, Բրիտանիա, Ֆրանսիա, Իտալիա, Ճապոնիա եւ Ռուսաստան) առաջնորդները հինգշաբթի օրը հավաքվում են Ֆրանսիայի առողջարանային Դովիլ քաղաքում՝ քննարկելու արաբական աշխարհում նոր ժողովրդավարական իշխանություններին աջակցություն ցուցաբերելու հարցը: Reuters-ի փոխանցմամբ, այդուհանդերձ, «Մեծ ութնյակի» երկօրյա գագաթաժողովում շատ ժամանակ կարող են խլել արեւմտյան եւ զարգացող տնտեսություններով երկրների միջեւ Արժույթի միջազգային հիմնադրամի հաջորդ ղեկավարի ընտրության շուրջ վեճերը: Դեռ չորեքշաբթի G8-ի պաշտոնական ներկայացուցիչները նախնական քննարկումներ էին անցկացրել՝ իրենց դիրքորոշումները համաձայնեցնելու այնպիսի հարցերում, ինչպիսիք են համաշխարհային տնտեսության աճը, Լիբիայում քաղաքացիական պատերազմը, Իրանի միջուկային ծրագիրը եւ Սիրիայում ժողովրդական հուզումները: Գագաթաժողովը նախագահում է Ֆրանսիայի առաջնորդ Նիկոլա Սարկոզին:
