«Ղարաբաղ» կոմիտեի անդամ Աշոտ Մանուչարյանի «քավորությամբ» ստեղծված Ժողովրդահայրենասիրական ուժերի եւ անհատ քաղաքացիների միավորումը, որին միացել է նաեւ ԺԿ նախագահ Տիգրան Կարապետյանը, երեկ երկրորդ համաժողովն է գումարել: Ընդունված հռչակագրում մասնավորապես ասվում է, որ միավորումը պատրաստվում է ձեւավորել «ազգային ճակատ» եւ «անզիջում պայքարով տեսանելի ժամանակահատվածում հասնել այնպիսի լայն ու հզոր հասարակական շարժման, որն ի զորու կլինի վերջ դնել արատավոր վարչահրամայական, կլանաօլիգարխային ռեժիմին՝ գործող իշխանությունների անհապաղ հրաժարականի եւ արդարության ու ժողովրդավարության վերականգնմանը միտված համակարգի ստեղծման, անկախ պետականության հզորացման եւ հեղինակության բարձրացման»: Ի թիվս այլ խնդիրների՝ այս ազգային ճակատում գտնում են, որ «երկրում տնտեսական կայունությունն ամրակայելու համար անհրաժեշտ է առավելագույնս խորացնել եւ ընդլայնել ՌԴ հետ ռազմավարական եւ բոլոր բնագավառներում սերտ հարաբերությունները՝ անհրաժեշտ մակարդակի բերելով հարաբերությունները ԱՊՀ այլ երկրների հետ, իսկ մնացած պետությունների հետ հաստատել փոխգործակցություն այնքանով, որքանով կբխի Հայաստանի գերակա շահերից»:
