![\"\"](\"https://www.aravot.am/2011/aravot_arm/May/25/p12.jpg\")
Ապրիլի 9-ին եւ 23-ին տեղեկացրել ենք, որ Հայաստանի բնապահպանական «Օրհուս» կենտրոնները Ճապոնիայի ավերիչ երկրաշարժից տուժածներին օգնելու համար օրիգամիներ՝ թղթե գունավոր կռունկներ պատրաստելու ակցիա իրականացրին: Գունավոր թղթից պատրաստված կռունկը ճապոնացիների համար խաղաղության, երջանկության ու բարեբերության խորհրդանիշ է: Նախաձեռնության հեղինակը Ստեփանավանի «Օրհուս» կենտրոնի կամավոր Ջոյ Անիտա Նաշին է, ով նաեւ պատրաստված թղթե կռունկները ԱՄՆ է տեղափոխել, ուր մի բարեգործական կազմակերպություն յուրաքանչյուր օրիգամիի համար 2 դոլար է փոխանցել ճապոնացի աղետյալներին: Ամենաշատ՝ 8500 օրիգամի պատրաստել են Ստեփանավանի «Օրհուս» կենտրոնի համակիրները՝ Ստեփանավանի գյուղատնտեսական քոլեջի ուսանողներ, այս տարածաշրջանի 12 գյուղերի բնակիչներ, դպրոցականներ: Ստեփանավանի բնապահպանական կենտրոնի աշխատողները գործը հեշտացնելու համար բնակչության շրջանում տարածել էին օրիգամի պատրաստելու մասին տեսանյութ: Ընդհանուր առմամբ Հայաստանի 14 «Օրհուս» կենտրոնների միջոցով պատրաստվել եւ ԱՄՆ է ուղարկվել 15 հազար օրիգամի: Այդ կերպ ճապոնացի աղետյալներին ցուցաբերվել է 30 հազար դոլար օգնություն:
