Երեկ Լոնդոնի համալսարանական քոլեջում (UCL) հայկական ուսանողական միության նախաձեռնությամբ մի խումբ ուսանողների հետ է հանդիպել թուրք առաջատար գիտնական Ուղուր Ունգորը, որն այժմ բնակվում է Հոլանդիայում եւ աշխատում Ուտրեխտի համալսարանի պատմության ֆակուլտետում: Հանդիպումն անցկացրել է Լոնդոնի Կոմիտաս ինստիտուտի տնօրեն Արա Սարաֆյանը: Թուրք գիտնական Ունգորն ինտենսիվորեն աշխատել է Օսմանյան կայսրության արխիվների հետ, ուսումնասիրել ինչ-ինչ փաստաթղթեր, որոնք վերաբերել են հիմնականում թուրք ազգայնականությանը, ազգային փոքրամասնությունների ոչնչացմանը եւ հատկապես հայերի բնաջնջմանը:
Ինչպես «Առավոտին» տեղեկացնում են հայկական ուսանողական միությունից, դոկտոր Ունգորը հանդիպման ժամանակ խոսել է Հայոց ցեղասպանության եւ թուրքական նոր էլիտաների ձեւավորման մասին, քննարկել հայերի ցեղասպանության մեխանիզմը 1915-1918 թվականների ընթացքում, նաեւ անդրադարձել է հայերի հարստության համակարգված առգրավմանը եւ վերաբաժանմանը: Թուրք գիտնականը հրապարակումներ ունի նաեւ Դիարբեքիրի ջարդերի մասին: Նրա վերջին աշխատություններից են «The Making of Modern Turkey: Nation and State in Eastern Anatolia, 1913-1950» եւ «Confiscation and Colonization: The Young Turk Seizure of Armenian Property» եւ այլն:
