Երկուշաբթի օրը Եվրամիությունը զգալիորեն ընդլայնեց Իրանի դեմ պատժամիջոցները, քանի որ Թեհրանի հետ միջուկային ծրագրի շուրջ բանակցություններում որեւէ առաջընթաց չգրանցելու փաստն ավելի մտահոգիչ է դարձել: Reuters-ի փոխանցմամբ, այդ մասին հաղորդել են ԵՄ դիվանագետները: Բրյուսելում տեղի ունեցած նիստում ԵՄ արտաքին գործերի նախարարները որոշել են 100 նոր անուն ընդգրկել այն ընկերությունների եւ անձանց ցանկում, որոնց ակտիվները ենթակա են սառեցման: Ցուցակն արդեն իսկ հաստատվել է:
Աշխարհի տերությունները կասկածներ ունեն, որ Իրանը ատոմային էներգիայի՝ խաղաղ նպատակներով օգտագործման քողի տակ փորձում է միջուկային զենք ստեղծել, թեեւ Թեհրանը հետեւողականորեն հերքում է այդ մեղադրանքները: Իրանի հետ բանակցությունները, որոնք ուղղված էին միջուկային ծրագիրը դադարեցնելու դիմաց առեւտրային արտոնությունների եւ տեխնոլոգիաներ տրամադրմանը, փակուղի են մտել:
