Երեկ մինչ հերթական աշխատանքային խորհրդակցության օրակարգային հարցերին անցնելը, Երեւանի քաղաքապետ Կարեն Կարապետյանը ներկայացրեց մայրաքաղաքի նոր գլխավոր ճարտարապետ Նարեկ Սարգսյանին՝ ասելով, որ դրական է գնահատում Երեւանի նախկին ճարտարապետ Միքայել Հասրաթյանի հետ համատեղ աշխատանքը. «Նա ազատվել է աշխատանքից իր դիմումի համաձայն եւ չեմ բացառում, որ պարոն Հասրաթյանը այլ կարգավիճակով կմնա համակարգում, եթե այդպիսի ցանկություն հայտնի»:
Արդեն օրակարգային հարցերին անցնելով՝ Կ. Կարապետյանը նշեց, որ մայրաքաղաքը պետք է ունենա աղբահանության բոլորովին այլ մակարդակ, որի համար էլ հանձնարարել է օպերատորների մրցույթ հայտարարելու նպատակով պատրաստել մրցութային փաստաթղթեր: Կանաչապատման խնդիրներին անդրադառնալով՝ քաղաքապետն ասաց, որ բոլոր վարչական շրջանների ղեկավարներին հանձնարարված է հատուկ ուշադրություն դարձնել կանաչ տարածքների եւ սիզամարգերի խնամքին. «Կայացած համատիրություններին քաղաքապետարանի կողմից կտրվեն խոտհնձող ժամանակակից սարքավորումներ: Այգին, պուրակը պետք է մշակված լինեն, խոտը՝ հնձված»: Բացի այդ, քաղաքապետը պահանջ է դրել հանրային սննդի օբյեկտներում ծխողների եւ չծխողների համար առանձնացված գոտիները պահպանել:
