Շուտով աշխարհի տարբեր անկյուններում կկազմակերպվի «Գրական գիշեր» նախաձեռնությունը, որի նպատակն է հասարակությանը ներկայացնել եվրոպական ժամանակակից գրականությունը: «Գրական գիշերը» կազմակերպում են չեխական կենտրոնները՝ EUNIC-ի (Եվրամիության մշակութային ազգային կենտրոնների միություն) հետ համագործակցությամբ, որին այս տարի միացել է նաեւ Բրիտանական խորհրդի հայաստանյան գրասենյակը՝ ներկայացնելով «Գրականության օր» միջոցառումների շարքը:
Այս միջոցառման շրջանակում երեկ Խնկո-Ապոր անվան մանկական գրադարանում Մեծ Բրիտանիայի արտակարգ եւ լիազոր դեսպան Չարլզ Լոնսդեյլը հանդիպեց 13-14 տարեկան պատանիների հետ: Դեսպանը նրանց համար ընթերցեց Ժյուլ Վեռնի «Ուղեւորություն դեպի երկրի կենտրոն» ստեղծագործությունը, որից հետո տեղի ունեցավ քննարկում: Միջոցառումից հետո Բրիտանական խորհուրդը գրադարանին տրամադրեց անգլերեն գրքեր: Դեսպանը նշեց, որ ընտրել է Ժյուլ Վեռնի «Ուղեւորություն դեպի երկրի կենտրոն» ստեղծագործությունը, քանի որ դա հենց եվրոպական պատմություն է:
