Հայաստանում կանայք հղիությունը հաճախ ընդհատում են 20 շաբաթական շրջանում, երբ պտուղն արդեն ձեւավորված է, եւ այդ երեւույթը բժշկական տեսանկյունից անթույլատրելի է համարվում, եթե, իհարկե, մայրը եւ երեխան առողջ են: Երեկ տեղի ունեցած մամուլի ասուլիսի ժամանակ, ըստ News.am-ի, այս մասին հայտարարեց Հայ-ամերիկյան մամոգրաֆիական կենտրոնի բժիշկ-գինեկոլոգ Նելլի Ավագյանը։ Նրա խոսքերով, հաճախ հայ մայրիկները հղիությունն ընդհատում են ուշ շրջանում, երբ իմանում են երեխայի սեռը. «Օրինակ, զույգը ցանկանում էր տղա ունենալ, սակայն պարզվում է, որ աղջիկ է ծնվելու կամ հակառակը»։ Նա ընդգծեց, որ Հայաստանում օրինական է համարվում մինչեւ 12 շաբաթական հղիության ընդհատումը, ավելի ուշ՝ այս պրոցեդուրան իրականացվում է միայն բժշկի ցուցումով, երբ վտանգված է մոր առողջությունը կամ պտուղը սխալ է զարգանում. «Հղիության արհեստական ընդհատումը վնասակար է կնոջ առողջության համար եւ կարող է հանգեցնել անպտղության։ Առավել վտանգավոր են տնային պայմաններում հղիության արհեստական ընդհատման դեպքերը, որոնք Հայաստանում բավական տարածված են։ Դրանք կարող են մահացու ելք ունենալ»։
