Կաննի կինոշուկայի առաջին օրերի ակտիվությունը եւ գործնականությունը դանդաղորեն տեղի է տալիս ձեռք բերված պայմանավորվածություններին, կնքված փաստաթղթերին, որոնք հետագայում հանրությանը կներկայանան իբրեւ ավարտուն ֆիլմեր կամ արժանահիշատակ կինոծրագրեր: Ըստ Հայաստանի ազգային կինոկենտրոնի մամուլի ծառայության, այսօր Կաննի կինոշուկայում աշխատանքը կավարտի նաեւ հայկական տաղավարը: Տասն օրերի ընթացքում տեղի ունեցած բազմաթիվ հանդիպումների եւ քննարկումների արդյունքում նախաստորագրվեցին երկու համատեղ համագործակցության պայմանագրեր. չեխական «Բարանդով» եւ ուկրաինական «Ինտերֆիլմ Պրոդաքշոն» ստուդիաների եւ Հայաստանի ազգային կինոկենտրոնի միջեւ: Հայկական պատվիրակության ղեկավար Գեւորգ Գեւորգյանը նշեց, որ Հայաստանի ազգային կինոկենտրոնի եւ երկու ստուդիաների միջեւ համագործակցության պայմանագրի վերջնական ստորագրումը տեղի կունենա Երեւանում` աշնանը: Չեխական կողմի հետ պայմանավորվածության համաձայն, Երեւանում կկազմակերպվի «Բարանդով» ստուդիայի երեւանյան շնորհանդեսը եւ կցուցադրվի մեկ մանկական ֆիլմ: Ուկրաինական կողմի հետ պայմանավորվածության համաձայն, ֆիլմի աշխատանքների ժամկետների ճշգրտման եւ քննարկման համար տեղի կունենա եւս մեկ հանդիպում:
Բացի այդ, հայկական պատվիրակությունը հանդիպումներ է ունեցել մի շարք միջազգային հայտնի կազմակերպությունների, կինոֆոնդերի եւ կրթական ուղղվածության կառույցների հետ:
