Այս շաբաթավերջին Վրաստանում ակնկալվում է բենզինի եւ դիզվառելիքի գների նվազում։ Այդ մասին տեղեկացնում է news.am-ը՝ վկայակոչելով «Бизнес Грузия»-ն: Էժանացումը կկազմի 5 տետրի (համարժեք է 11 դրամին)։ Այսպիսով՝ մանրածախ ցանցում բենզինը Վրաստանում կարժենա 2,15 լարի, ինչը համարժեք է 480 դրամին։
Միջազգային շուկաներում նավթն արդեն երկու շաբաթ է, ինչ էժանանում է: Սակայն երեկ բորսաներում արձանագրվել է որոշ թանկացում՝ կապված ԱՄՆ էներգետիկայի նախարարության այն հրապարակման հետ, համաձայն որի՝ երկրում նավթի պաշարները նվազել են։
Նյու Յորքի NYMEX բորսայում հունիսյան մատակարարման ամերիկյան թեթեւ նավթի գինը կրկին գերազանցել է 100 դոլարը՝ 1 բարելի դիմաց, կազմելով 100,24 դոլար։ Լոնդոնի ICE Futures բորսայում Brent տեսակի եվրոպական 1 բարել նավթի գինը հուլիսյան մատակարարման համար կազմում է 112,55 դոլար։
