ԱԺ «Ժառանգություն» խմբակցության պատգամավոր Անահիտ Բախշյանը ՀՀ փոխվարչապետին ուղղված նամակով Արագածոտնի մարզում կուտակված խնդիրների վերաբերյալ առաջարկել էր կազմակերպել քննարկում, որը տեղի է ունեցել մայիսի 16-ին, Արագածոտնի մարզպետարանում: Քննարկման արդյունքներն ու այնտեղ ծագած հարցերն այսօր պատգամավորն ուղղել է ՀՀ փոխվարչապետին: «Ձեզ եմ ներկայացնում նաեւ ՀՀ պաշտպանության նախարար Ս. Օհանյանի՝ ինձ տրամադրած նամակների պատճենները՝ 2010-ի եւ 2011 թվականի հունվարի 1-ի դրությամբ ՀՀ ԶՈՒ զորամասերում ժամկետային պարտադիր զինվորական ծառայության մեջ գտնվող, գրագիտություն չունեցող եւ գրավոր հայերենին չտիրապետող, ըստ մարզերի, զինծառայողների քանակական տվյալների մասին: Արագածոտնի մարզից 2010-ին՝ 25, 2011-ին՝ 29 գրագիտություն չունեցող զինվոր»,- վարչապետին ուղղված հարցերից մեկն էլ սա էր: Սրանից ելնելով, տիկին Բախշյանն առաջարկել է մարզպետների գործունեության տարեկան գնահատման ժամանակ հաշվի առնել նաեւ այս հանգամանքը:
