Երբեմնի ջրառատ Սիսիանում ոչ միայն այգիները, այլեւ պատերազմում զոհված սիսիանցիների հիշատակին կառուցված աղբյուրներն են ցամաքել
![\"\"](\"https://www.aravot.am/2011/aravot_arm/May/20/p15.jpg\")
![\"\"](\"https://www.aravot.am/2011/aravot_arm/May/20/p10.jpg\")
Մեկ տարուց ավելի է, ինչ Սիսիան քաղաքի փողոցները քարուքանդ են. «Հայջրմուղկոյուղին» նախորդ տարվա գարնանից մինչ այսօր քաղաքի ջրամատակարարման ցանցը փոխելու համար շարունակում է փողոցներն ավերել: Ցանցը փոփոխելու պատճառով եւ ոռոգման ջրի բացակայության պայմաններում շատ սիսիանցիներ այս տարի հրաժարվել են իրենց այգիները մշակել:
![\"\"](\"https://www.aravot.am/2011/aravot_arm/May/20/p9.jpg\")
«Հայջրմուղկոյուղու» ջրային ցանցի «բարենորոգումների» արդյունքում ջրազրկված են անգամ հայրենիքի համար արյուն թափած, արցախյան ազատամարտից հետո տուն չվերադարձած սիսիանցի մարտիկների հիշատակին կառուցված հուշաղբյուրները:
![\"\"](\"https://www.aravot.am/2011/aravot_arm/May/20/p12.jpg\")
Սիսիանում մշակութային օջախները վաճառքի են հանվում: «Առավոտի» 2009 թվականի փետրվարի 13-ի «Հիսնամյա դպրոցի 35-ամյա ծրագիրը» հրապարակմամբ տեղեկացրել էինք, որ Սիսիանի նախկին քաղաքապետ Լավրենտի Սարգսյանի օրոք համայնքին պատկանող քաղաքի երաժշտական դպրոցի շենքը սեփականաշնորհվել է ոմն Վարդան Գրիգորյանի: Վերջինս էլ այժմ այդ տարածքը 20 հազար ԱՄՆ դոլարով վաճառքի է հանել:
![\"\"](\"https://www.aravot.am/2011/aravot_arm/May/20/p11.jpg\")
Սիսիանի միակ բարեկարգ վայրը կենտրոնական հրապարակն է, որտեղ էլ տեղակայված է քաղաքապետարանը: Հրապարակում հավաքված սիսիանցիներն ասում էին, որ իրենց համայնքի ղեկավար Աղասի Հակոբջանյանը ոչ թե Սիսիան քաղաքի, այլ այս հրապարակի քաղաքապետն է:
![\"\"](\"https://www.aravot.am/2011/aravot_arm/May/20/p13.jpg\")
Քաղաքի թիվ 2 նախակրթարանի երեխաները մինչեւ վերջերս այսպիսի ճանապարհով էին ամեն օր մանկապարտեզ հաճախում: Այս օրերին փողոցը ասֆալտապատվում է: Ցավոք, քաղաքի բազմաթիվ քանդված փողոցներից միայն այս մեկն է ասֆատլապատվում:
![\"\"](\"https://www.aravot.am/2011/aravot_arm/May/20/p14.jpg\")
Սա էլ Սիսիանի «Հյուսիսային պողոտան է»: Այն Սյունիքի միակ ձեռքբերումը չէ: Ինչպես սիսիանցիներն են ասում՝ այս մարզում վերջերս 2 ռեկորդ է գրանցվել. մեկը՝ Տաթեւում աշխարհի ամենաերկար ճոպանուղին, մյուսը Սիսիանում՝ աշխարհի ամենակարճ ասֆալտը: Ի դեպ, վերջին ռեկորդի հեղինակը ԱԺ ՀՀԿ-ական պատգամավոր Հերմինե Նաղդալյանի ամուսինն է՝ Էջմիածնի հարկայինի պետ, ծնունդով սիսիանցի Դավիթ Բեգլարյանը: Նա ասֆալտապատել է միայն հայրական տան մատույցները եւ դիմացի ճանապարհին եզրաքարեր տեղադրել:
«Հայջրմուղկոյուղու» հարավային մասնաճյուղի տնօրեն Ջիվան Մարգարյանը անցած տարվա նոյեմբերին «Առավոտին» ասել էր, որ շինարարական աշխատանքները ավարտվելու են դեկտեմբերին (20.11.2010՝ «Սիսիանը դեռ քարուքանդ է»): Արդեն 2011-ի մայիսն է վերջանում, աշխատանքները չեն վերջացել:
