«Արմինֆո»-ի հաղորդմամբ, Պոդմոսկովիեի իրավապահ մարմինների աշխատակիցը երեկ հաղորդել է, որ մայիսի 17-ի երեկոյան Մոսկվայի մարզի Լյուբերեցկի շրջանում զանգվածային ծեծկռտուք է տեղի ունեցել Ադրբեջանից եւ Հայաստանից ժամանածների միջեւ: Աղբյուրի համաձայն, միջադեպը տեղի է ունեցել ժամը 22:30-ի սահմաններում, Օկտյաբրսկի ավանի Տեքստիլշիկների փողոցում: Ծեծկռտուքի ընթացքում երկու կողմերն էլ կիրառել են սառը եւ տրավմատիկ զենք: Արդյունքում՝ 24-ամյա մի տղամարդ զոհվել է տեղում՝ դանակի հարվածից, յոթին տեղափոխել են հիվանդանոց՝ հրազենային եւ սուր-կտրող գործիքից ստացված վերքերով: Դեպքի վայրում ոստիկանության աշխատակիցները հայտնաբերել են տրավմատիկ զենքի շուրջ 17 պարկուճ: Ընթանում է նախաքննություն:
