Թբիլիսիում ընթացող շախմատի կանանց Եվրոպայի անհատական առաջնության ութերորդ տուրում մեր հանրապետության երեք առաջատարներից հաղթանակ տարան Էլինա Դանիելյանն ու Լիլիթ Մկրտչյանը, իսկ ահա Լիլիթ Գալոյանը պարտություն կրեց: Երեկ կայացած իններորդ տուրից առաջ, որում Էլինան խաղում էր ռուսաստանցի Տատյանա Կոսինցեւայի, Գալոյանը՝ ուկրաինուհի Մարիա Մուզիչուկի, իսկ Մկրտչյանը՝ չեխ Կատերինա Նեմցովայի հետ, Հայաստանի լավագույն շախմատիստուհի Էլինա Դանիելյանը 6,0 միավորով ընթանում էր մրցաշարային աղյուսակի երրորդ հորիզոնականում: Նրան ընդամենը կես միավոր էր բաժանում երկու առաջատարներից՝ Վիկտորիա Սմիլիտեից (Լիտվա) եւ Բելա Խոթենաշվիլուց (Վրաստան): Գալոյանն ու Մկրտչյանը 5,0-ական միավորով, համապատասխանաբար, զբաղեցնում էին 21-րդ եւ 27-րդ տեղերը:
