Մոսկվայի մարզում ազգայնականների ձեռքով սպանվել է Հայաստանի 22-ամյա քաղաքացի Գրիգոր Հուսնյանը: Ռուսաստանի հայերի միության մամուլի ծառայությունը հայտնում է, որ ողբերգական միջադեպը տեղի է ունեցել Մոսկվայի մարզի Չեխովի շրջանի Նովի Բիտ գյուղում: Նախնական տվյալներով, երեք հայերի վրա հարձակվել են մի քանի տասնյակ արմատական այլատյացներ: Դաժան ծեծի հետեւանքով Գրիգոր Հուսնյանը գլխի ծանրագույն վնասվածք է ստացել եւ տեղափոխվել Չեխովի շրջանային հիվանդանոց, որտեղ էլ մահացել է: Նրա երկու ընկերները եւս ծանր վնասվածքներ էին ստացել, սակայն նրանց կյանքին այժմ ոչինչ չի սպառնում: Հուսնյանը Մոսկվայի մարզում աշխատում էր որպես շինարար եւ ընտանիքի միակ կերակրողն էր: Նրա քույրը հաշմանդամ էր դարձել դեռ երկրաշարժի ժամանակ, եւ տարեց մայր ուներ: Ռուսաստանի հայերի միությունը հույս է հայտնել, որ քննչական մարմինները կարագացնեն հետաքննությունը եւ մեղավորներին քրեական պատասխանատվության կենթարկեն:
