![\"\"](\"https://www.aravot.am/2011/aravot_arm/May/14/p10.jpg\")
Սիրիայի նախագահ Բաշար ալ-Ասսադը զինվորականներին հրահանգել է ցուցարարների վրա չկրակել: Այդ մասին, ուրբաթօրյա աղոթքի նախօրեին, Reuters-ին հայտնել է սիրիացի իրավապաշտպաններից մեկը՝ Լուաի Հուսեյնը, մանրամասնելով, թե հինգշաբթի օրը Ասսադի խորհրդականն իրեն հեռախոսային զրույցի ժամանակ ասել է, որ «նախագահական հրամանագրեր են տարածվել, որում հրահանգված է ցուցարարների վրա չկրակել, եւ նրանք, ովքեր կխախտեն այդ հրահանգը՝ պատասխանատվության կենթարկվեն»:
Հուսեյնը ընդդիմության այն չորս ներկայացուցիչներից մեկն է, որն այս ամսվա ընթացքում հանդիպել էր Շաաբանի հետ եւ փոխանցել էր ցուցարարների, այդ թվում՝ բողոքի ակցիաների դաժան ճնշումը դադարեցնելու եւ 1970-ից ի վեր Ասսադների ընտանիքի կողմից կառավարվող մերձավորարեւելյան այդ երկրում քաղաքական բարեփոխումներ սկսելու, պահանջները:
Ուրբաթ օրը, որը մահմեդականների համար աղոթքի ավանդական օրն է, սիրիացիների համար հավաքվելու եւ ցույցեր անելու համար միակ հնարավորությունն է: Այս ուրբաթը դառնալու էր լակմուսի թուղթ՝ իշխանությունների կողմից անկարգություններին գործնականում վերջ տալու մասին պնդումների համար: Շաաբանը նման հայտարարություն նաեւ մարտին էր արել, երբ սկսվել էր ժողովրդական հուզումների առաջին ալիքը: Արդյունքում՝ իշխանությունները տեղի ունեցածի համար մեղքը բարդել էին, իբր, իսլամիստների եւ օտարերկրյա գործակալների կողմից աջակցություն վայելող «ահաբեկչական զինված խմբավորումների» վրա:
