![\"\"](\"https://www.aravot.am/2011/aravot_arm/May/13/p29.jpg\")
Երեկ Շուշան Պետրոսյանն ու Արթուր Իսպիրյանը ակումբներից մեկում պետք է խոսեին «Եվրատեսիլում» Էմմիի արդյունքների եւ այդ մրցույթում առհասարակ Հայաստանի մասնակցության անհրաժեշտության մասին: news.am-ի փոխանցմամբ, Շուշան Պետրոսյանը, սակայն, անսպասելի հրաժարվել է մասնակցել ասուլիսին՝ նեղանալով, որ իր համար նախօրոք աթոռ չի դրվել:
«Չէի՞ք նախատեսել, որ գալու էի։ Հյուրերին այսպես չեն դիմավորում»,- ասել է երգչուհին եւ շրջվել՝ հեռանալու համար: Երբ ասուլիսը վարողը նշել է, որ շուտով աթոռ կբերի եւ երգչուհուն խնդրել վերադառնալ, ըստ աղբյուրի, երգչուհին դուռը շրխկացնելով՝ հեռացել է ակումբից: Չի օգնել նաեւ երգահան, ասուլիսի մյուս բանախոս Արթուր Իսպիրյանի խնդրանքը։ Երգչուհին այդպես էլ անհաղորդ է մնացել դրան:
Ինչ վերաբերում է Արթուր Իսպիրյանին, նա ասել է, թե կցանկանար, որ Հայաստանը «Եվրատեսիլին» ներկայանար առավել խորը եւ արժանապատիվ, ոչ թե Boom-Boom -ի նման ոչինչ չասող կատարմամբ։ «Կարծում եմ՝ ավելի ճիշտ կլինի, որ հաջորդ տարի Հայաստանն այդ մրցույթին մասնակցի ռոք կատարմամբ, պրոֆեսիոնալ թիմով, ընդ որում՝ լավագույն տարբերակ կարող է լինել, օրինակ, «Դորիանս» խումբը,- նկատել է երգահանը։
Նրա խոսքով, Էմմին բազմաթիվ արժանիքներ եւ մրցանակներ ունի, լուրջ երգչուհի է, եւ «Եվրատեսիլին» մասնակցելիս պետք է տուրք տար ոչ թե կոմերցիոն կարգի կատարմանը, այլ մասնակցության համար առավել խորը, լավ գործիքավորված եւ լուրջ երգ ընտրեր։ «Եթե Boom-Boom-ը ներկայացվեր նախորդ տարի, գուցե նույնիսկ հաղթող ճանաչվեր, սակայն ինչպես երեւաց, այս տարի մրցույթի կազմակերպիչներն առավել մեծ ուշադրություն դարձնում էին երգերին, ոչ թե շոուին»,- ասել է Իսպիրյանը։ Նա նշել է, որ հավանել է Ադրբեջանի եւ մանավանդ Վրաստանի կատարումները։
Կոմպոզիտոր Երվանդ Երզնկյանը՝ անդրադառնալով «Եվրատեսիլ-2011»-ի կիսաեզրափակիչում Էմմիի ելույթին, ասել է. «Էմմիի սխալների պատճառն այն է, որ նա չափից ավելի շատ է լսում իրեն խորհուրդ տվողներին»:
