![\"\"](\"https://www.aravot.am/2011/aravot_arm/May/13/p26.jpg\")
Ռամզան Կադիրովն ընդդեմ Դիեգո Մարադոնայի. այսպես կարելի է բնութագրել չորեքշաբթի օրը Գրոզնիում կայացած ֆուտբոլային ընկերական հանդիպումը, որին մասնակցում էին Կովկասի հավաքականն ու աշխարհի ֆուտբոլային աստղերի ընտրանին: «Ազատություն» ռ/կ-ի մատուցմամբ, Կովկասի հավաքականը, որն առավելապես չեչեն պաշտոնյաներից էր կազմված, 5:2 հաշվով հաղթեց աշխարհի հավաքականին, որում, ի դեպ, ընդգրկված էին այնպիսի վետերան աստղեր, ինչպիսիք են Դիեգո Մարադոնան, Լուիշ Ֆիգուն, Իվան Սամորանոն եւ 1998 թվականին Ֆրանսիայի հավաքականի կազմում աշխարհի չեմպիոնի տիտղոսը նվաճած հայազգի Ալեն Բողոսյանը:
Չեչնիայի 34-ամյա նախագահի այս հերթական աղմկալի ու թանկարժեք նախաձեռնությունը նվիրված էր Գրոզնիի նորակառույց մարզադաշտի շահագործմանը: 280 միլիոն դոլար արժողությամբ այս ստադիոնը կրում է Ռամզան Կադիրովի հոր՝ նախկին նախագահ Ահմադ Կադիրովի անունը:
Խորհրդանշական է, որ Կադիրովների ընտանիքում Գրոզնիի մարզադաշտը մի անգամ արդեն ճակատագրական դերակատարություն ունեցել է. Չեչնիայի ներկայիս նախագահի հայրը 2004 թվականի մայիսի 9-ին զոհվեց հենց Գրոզնիի «Դինամո» ստադիոնում տեղի ունեցած ռումբի պայթյունից:
Ռուսական մի շարք աղբյուրներ պնդում են, որ Գրոզնիի նորաբաց ստադիոնը Ռուսաստանում ամենաթանկարժեքներից մեկն է: Այն ոչ միայն ֆուտբոլային դաշտ ունի, այլեւ լողավազան ու թենիսի կորտեր: Մարզադաշտը 30 հազար ֆուտբոլասեր ընդունելու հնարավորություն ունի:
Տեղացիներից շատերը, սակայն, պնդում են, որ Չեչնիայի իշխանությունները մարզադաշտի կառուցման ընթացքում ուսանողներին եւ բյուջետային հիմնարկների աշխատակիցներին ամիսներ շարունակ ներգրավում էին շինարարական աշխատանքներում՝ պարբերաբար շաբաթօրյակներ կազմակերպելով:
Չեչնիայում նաեւ նշում են, որ թանկարժեք եւ ժամանակակից այս մարզադաշտի կառուցմամբ Ռամզան Կադիրովը ակնկալում է Գրոզնիի ընդգրկումը ռուսաստանյան այն քաղաքների շարքում, որոնց իրավունք կտրվի հյուրընկալել 2018 թվականի ֆուտբոլի աշխարհի առաջնությունը:
