Իրանի նախագահ Մահմուդ Ահմադինեջադը նախօրեին կառավարության նիստում հերքել է տեղեկությունը, թե կառավարության պաշտոնյաները զբաղվում են կախարդությամբ: Այդ մասին փոխանցում է news.am-ը՝ վկայակոչելով SalamNews-ը: «Եթե կախարդներն ինչ-որ բան կարող են իրապես կախարդել, ապա ինչո՞ւ դա չեն անում իրենց համար»,- ասել է Ահմադինեջադը: Նախագահը հերթական անգամ նաեւ հերքել է իր եւ հոգեւոր առաջնորդ, այաթոլլա Ալի Խամենեիի հետ հակասություններ ունենալու մասին տեղեկությունները. «Երկրի հոգեւոր ղեկավարությունը Իմամ Մահդիի նշած ուղու հետեւորդն է: Կառավարությունը ներդնում է բոլոր ջանքերը, որ հետեւի այդ ուղղությանը՝ հանուն Իսլամական Հանրապետության զարգացման եւ բարգավաճման»:
Հիշեցնենք, որ Իրանում օրերս ձերբակալվել են Մահմուդ Ահմադինեջադի մերձավոր շրջապատի մարդիկ՝ հենց մոգության եւ կախարդության մեղադրանքներով: Այդ իրադարձությունը Ահմադինեջադի եւ Խամենեիի միջեւ նոր հակասությունների առիթ է հանդիսացել:
