Ապրիլի 26-30-ը իսպանական Պալմա դե Մայորկա քաղաքում կայացել է Ժողովրդական պարերի 16-րդ միջազգային մրցույթ-փառատոնը:
Ինչպես հաղորդեցին ԱԳՆ մամուլի, տեղեկատվության եւ հասարակայնության հետ կապի վարչությունից, Իսպանիայում Հայաստանի դեսպանության նախաձեռնությամբ եւ միջնորդությամբ` ազգային երգի եւ պարի այդ հեղինակավոր ստուգատեսին Հայաստանն առաջին անգամ հրավեր է ստացել մասնակցելու` ներկայանալով «Կարին» ազգագրական երգի եւ պարի համույթով: Մրցույթին մասնակցում էին համույթներ 17 երկրներից: Հայկական պարախումբը` Մայորկայի, Ուելսի, Թայվանի ու Թուրքիայի համույթների հետ միասին ընտրվել է մասնակցելու մեծ գալա համերգին: «Կարինը» բացառիկ ընդունելության է արժանացել, եւ միջազգային ժյուրին հայ արտիստներին ճանաչել է առաջինը «Լավագույն պարեր» անվանակարգում եւ երրորդը` «Երաժշտական կատարում» անվանակարգում:
