Գեղարքունիքի մարզի Ծովինար գյուղում ժամանակին գործում էր «Սեւան» ազգային պարկի պետական տնկարանը, ուր Սեւանի ավազանի եւ Հայաստանի մյուս շրջանների անտառների եւ այգիների համար արտադրվում էին մի քանի հարյուր հազար դեկորատիվ եւ պտղատու ծառատեսակների տնկիներ:
Տնկարանը սեփականաշնորհվել ու լուծարվել է: Տեղում մասնավոր մի անձ սեփական տնկարան է հիմնել, իսկ տնկարանի մասնագետներն իրենց տնամերձ հողամասերում են տնկիներ աճեցնում: Ծովինարցի Խաչիկ Տեր-Հովսեփյանը միայն այս գարնանը արտադրել եւ իրացրել է մոտ ութ հազար տնկի` հիմնականում խնձորենի, տանձենի, ծիրանենի, դեղձենի, ընկուզենի, սալորենի, կեռասենի, բալենի: Գեղարքունիքում ցուրտ կլիմային սովորած եւ փորձարկված տնկիները բարձր կենսունակություն ունեն:
