Ապրիլի լույս 29-ի գիշերը, լուսադեմին, Տավուշի մարզի Դեբեդավան գյուղում գայլը մտել է գառների ցանկապատված պահատեղ եւ խեղդել դեբեդավանցի Ալբերտ Մովսիսյանի 10 գառը, մի գառ էլ առեւանգել: Ալբերտի 17 գառներից 11-ը զոհ է դարձել գիշատիչ կենդանուն: Ալբերտ Մովսիսյանի տունը գյուղի կենտրոնում է, սակայն անասունների պահատեղը Դեբեդավանի ծայրին գտնվող կիսակառույց շենքի մոտ է: Դեբեդավանի գյուղապետ Վանյա Դամիրչյանը հայտնեց, որ գայլը նույն գիշեր վնասել է նաեւ դեբեդավանցի Ասլան Միքայելյանի ձիուն:Գյուղապետի վկայությամբ՝ ամեն տարի ապրիլի վերջին, մայիսի սկզբին գայլերը հարձակվում են գյուղի անասունների վրա: Անցյալ տարի Վրաստանին սահմանակից այս գյուղում գայլերի զոհ է դարձել 16 անասուն:
