«Մենք ակնկալում ենք, որ մոտալուտ ընտրությունները, որոնք կկայանան 2012թ., կլինեն ազատ եւ արդար, կհամապատասխանեն Եվրոպական Միության չափանիշներին»,- երեկ Երեւանում հայտարարել է Եվրոպական Միության ընդլայնման եւ Եվրոպական հարեւանության քաղաքականության հարցերով հանձնակատար Շտեֆան Ֆյուլեն՝ ՀՀ արտգործնախարար Էդվարդ Նալբանդյանի հետ համատեղ ասուլիսում: Նա կարեւորել է, որ ընտրական գործընթացների անցկացումը համապատասխանի օրենսդրությանը՝ միաժամանակ շեշտելով, որ կարեւոր է ոչ միայն լավ օրենսդրություն ունենալը, այլեւ այդ օրենսդրության լավ կիրառումը։ Հանձնակատարն ասել է, թե 2008
թ. մարտյան իրադարձությունների հետ ուղղակիորեն կապված հանգամանքներում ազատազրկված մարդկանց խնդրի հետ կապված իր առաջին այցից մինչ ներկա այցը առաջընթաց կա, «բայց իրավիճակը շատ ավելի գլոբալ է, շատ ավելի լայն է, եւ պետք է, որ այն որպես այդպիսին ընկալեն նաեւ Հայաստանում՝ քաղաքական գործիչները»:
Շտեֆան Ֆյուլեն հայտարարել է, թե «այդ իրադարձություններից անցել է երեք տարի, եւ կարեւոր է, որ Հայաստանի քաղաքացիները լիարժեք պատկերացում ստանան այն մասին, թե ինչ է տեղի ունեցել եւ ով է պատասխանատու»: Եվրոպացի դիվանագետը շեշտել է, թե մեծ բավականությամբ ի գիտություն է ընդունել նախագահ Սերժ Սարգսյանի՝ օրեր առաջ արած հայտարարությունը՝ կապված «Մարտի 1»-ի գործի քննության հետ։
