«Առավոտի» երեկվա համարում տեղեկացրել էինք «Կրթություն եւ ուսուցում-2011» ցուցահանդեսի մասին, որի ընթացքում կրթության ոլորտում գործող տարբեր կազմակերպություններ հատուկ տաղավարներով ներկայացնում էին իրենց գործունեությունը: Նաեւ նշել էինք, որ բոլոր կրթական ցուցահանդեսներին պարտաճանաչ կերպով ներկայացված է լինում «Մահարիշի» վեդայական կենտրոնը, որը հայոց եկեղեցին համարում է աղանդավորական հաստատություն: Իսկ այս ցուցահանդեսին այն ներկայացված չէր: ԿԳ նախարար Արմեն Աշոտյանը, պատասխանելով մեր հարցին, արդյոք ԿԳՆ-ից հատուկ զգուշացում եղե՞լ է՝ այդ կենտրոնին չներգրավել ցուցահանդեսում, պատասխանել էր. «Ձեր նշած կենտրոնին ծանոթ չեմ: Ավելին, այժմ նախարարությանը տարբեր «հասարակական կազմակերպություններ» մեղադրում են նրանում, որ մասնավոր դպրոցներ ենք փակում, որոնք աղանդավորական են: Ուստի իրականում այսօր խնդիրը շատ ավելի լուրջ է, քան արեւելյան փիլիսոփայության դասավանդման կամ թրեյնինգի կենտրոնի առկայությունը ցուցահանդեսին: Դրա լինել-չլինելուց ի՞նչ է փոխվելու»:
