Գեղարքունիքի մի շարք գյուղերում դեռեւս չեն իրականացվել անասնաբուժական միջոցառումներ, համաճարակային հիվանդությունների դեմ պատվաստում չեն ստացել ոչ խոշոր, ոչ էլ մանր եղջերավոր անասունները, անասնաբույժներն էլ դեռ չեն ստացել այս տարվա երեք ամիսների աշխատավարձը:
Կարող է զարմանալի թվալ, սակայն մեղավորը պետությունն է: Այս տարվա հունվարից անասնաբուժական ծառայությունները դուրս են բերվել գյուղատնտեսության նախարարության համակարգից՝ այլ կառույցում ընդգրկելու նպատակով, սակայն խնդիրը մինչ օրս բաց է, ինչի արդյունքում էլ ուշացել են անասնաբուժական խիստ կարեւոր միջոցառումները: Մինչդեռ անցած տարիներին թռչնագլխաքանակը չպատվաստելու արդյունքում գյուղացիները լուրջ անկումներ եւ վնասներ են կրել:
Ցավոք, մեծ է հավանականությունը, որ այս տարի էլ վնասներից խուսափել չի լինի: Արդեն արոտ են դուրս եկել ոչխարի չպատվաստված հոտերը, իսկ ամենաուշը երկու շաբաթից սկսվելու է կովերի արոտի շրջանը: Եթե մինչեւ արոտ դուրս գալը անասունները չպատվաստվեն, ապա մոտակա ամիսներին բրուցելոզի, պալարի, դաբաղի եւ սիբիրախտի դեպքեր կլինեն` դրանցից բխող անցանկալի հետեւանքներով:
