Իր անձնական մեքենայով Վրաստան այցելած Տավուշի մարզի Ոսկեպարի դպրոցի տնօրեն Նվեր Բեգլարյանին Վրաստանի Մառնեուլիի շրջանի պետավտոտեսուչներից մեկը պատմել է դիլիջանցի այն վարորդի մասին, որը ճանապարհային երթեւեկության կանոնների խախտում էր կատարել: Վերջինս սույն տեսուչին հորդորել է խախտման ակտ չգրել, նրան մեկնելով 10 լարիանոցը (մոտ 2000 դրամ): «Վերցրու, վերցրու»,- երկու անգամ առաջարկել է դիլիջանցի վարորդը: Պետավտոտեսուչը մերժել է: Երբ դիլիջանցին համառել է, տեսուչը ոստիկանություն է կանչել:
Հայ վարորդը 3 ամիս նստել է վրացական բանտում եւ վճարել 6000 լարի տուգանք: Այժմ նա ազատության մեջ է, հայրենի Դիլիջանում: Դիլիջանցի ծանոթները հաստատեցին այդ փաստը, սակայն չկարողացան կամ չցանկացան հիշել վարորդի անուն-ազգանունը:
