Յուրաքանչյուրի Մորիկյանը

Երեկ Ազգային գրադարանում տեղի ունեցավ «Հայաստանի Հանրապետություն» թերթի հիմնադիր եւ մինչեւ 1997թ. խմբագիր աշխատած, այնուհետեւ տարբեր տարիների՝ «Օրրան», «Ժամանակ» թերթերը, «Հայացք Երեւանից» ամսագիրը խմբագրած Այդին Մորիկյանին նվիրված «Հանդիպում» գրքի շնորհանդեսը: Ուսուցչի մասին գիրք հրատարակելու մտահղացումը Ա. Մորիկյանի ուսանողներինն էր: Գրքի հրատարակության եւ տպագրության հարցում ուսանողներին աջակցել են Ա. Մորիկյանի ընկերները:
«Նրա հետ յուրաքանչյուր հանդիպում նորի, լավի, բարու բացահայտում էր, եւ մենք չէինք ուզում, որ այդ հանդիպումներն ավարտվեին»,- ասում է նրա ուսանողներից Ռուզաննա Մինասյանը: «Հանդիպում» գրքի խմբագիր Մեսրոպ Հարությունյանը խոստովանեց, որ փորձել է քիչ խմբագրել ուսանողների աշխատանքները, որոնք տեղ են գտել այս գրքում: «Հանդիպումը» գրված է առաջին դեմքով, եզակի թվով, իսկ նյութերն անստորագիր են, քանի որ ուսանողների խոստովանմամբ՝ ուսուցչի մասին իրենք բոլորն ունեն մեկ միացյալ հիշողություն: «Այս գրքում այն է, ինչ ստացել ենք դասերի ընթացքում»,- նշեց ուսանողուհի Ռուզան Մինասյանը:
Շապիկի նկարը նախկին վարչապետ Արամ Սարգսյանինն է, որը վերջինս նվիրել է Ա. Մորիկյանին: Այն կոչվում է «Ճանապարհ դեպի լույսը» եւ պատկերում է դեպի տիեզերք գնացող մարդու: «Շատ դժվար է ընկերոջդ այդպիսի նկար նվիրել, առավել եւս, երբ գիտես նրա հիվանդության մասին»,- խոստովանում է Ա. Սարգսյանը:
2009թ. մայիսի 21-ին պետք է տեղի ունենար ուսանողների ավարտական միջոցառումը, բայց մայիսի 19-ին մահացավ Ա. Մորիկյանը; Ուսանողները մեկ ամիս հետաձգեցին միջոցառումը եւ նվիրեցին այն Ա. Մորիկյանի հիշատակին: Գրքի շնորհանդեսի ժամանակ նաեւ փոքրիկ հատված ցուցադրվեց այդ միջոցառումից: Ուսանողների խոստովանմամբ՝ իրենց բոլորի հաջողությունների եւ կայացման մեջ մեծ ներդրում ունի իրենց ուսուցիչը: Լրագրող, հրապարակախոս Անահիտ Ադամյանի ձեւակերպմամբ էլ. «Յուրաքանչյուրն ունի իր Մորիկյանը, ով չի սահմանափակվում 1958-2009 թվականներով»: