![\"\"](\"https://www.aravot.am/2011/aravot_arm/April/27/p13.jpg\")
Սուրբ Հարության տոնի առթիվ «Էրեբունի» քրեակատարողական հիմնարկում, 1997թ.-ին կառուցված եկեղեցում, ձեռամբ քրեակատարողական հիմնարկի հոգեւոր տեսուչ տ. Ռուբեն աբեղա Զարգարյանի եւ դատապարտյալների մասնակցությամբ, մատուցվեց Սուրբ պատարագ:
Արարողությանը մասնակցում էին քրեակատարողական վարչության պետի առաջին տեղակալ Ռ. Հովհաննիսյանը, վարչության պետի տեղակալ Մ. Հարությունյանը եւ ՀՀ ԱՆ «Էրեբունի» ՔԿՀ-ի վարչակազմը՝ հիմնարկի պետ Հ. Պետրոսյանի գլխավորությամբ:
Սուրբ պատարագի ընթացքում հայր Ռուբենը ներկաներին փոխանցեց Ն.Ս.Օ.Տ.Տ. Գարեգին Բ. Ամենայն հայոց կաթողիկոսի օրհնությունն ու զատկական պատգամը: Այնուհետեւ դիմելով ներկաներին՝ հոգեւոր առաջնորդը ուրախություն հայտնեց ձեւավորվող համագործակցության եւ քրեակատարողական ծառայության պատրաստակամության համար, որի շնորհիվ հնարավոր դարձավ պատարագի կազմակերպումը, ինչպես նաեւ տարբեր ձեռնարկների միջոցով ազատազրկվածների հոգեւոր կանոնավոր խնամատարությունը:
Անդրադառնալով Սուրբ Հարության խորհրդի կարեւորությանը՝ հայր սուրբը մասնավորաբար նշեց. «Սուրբ Զատիկը մեր՝ քրիստոնյաներիս հաղթանակի տոնն է: Տիրոջ հարությամբ ոչ միայն խորտակվեց մեղքի ու մահվան իշխանությունը, այլեւ մարդկային նոր կյանքի սկիզբը դրվեց: Այսօր մենք եւս կանգնած ենք Սուրբ Հարության խորհրդի առջեւ՝ ոչ միայն ամրապնդելու մեր հավատն ու հույսը, այլեւ վերափոխելու մեր կյանքը»:
Սուրբ պատարագի ավարտին եկեղեցու հարեւանությամբ տեղակայված խաչքարի մոտ, որը կառուցվել է 1988թ. երկրաշարժի զոհերի հիշատակին, կատարվեց նաեւ հոգեհանգիստ՝ ի հիշատակ Մեծ եղեռնի անմեղ զոհերի:
